Puisi Bahasa Lahat (Lematang) Chairul Sujan

Chairul Sujan hunt di Desa Tanjung Sirih Kec. Pulau Pinang

Balada Gimbel

Dek keruan sandi mane rabanan itu singgah

Kulu kilir tengah jalan, pehuot lapae dide diasekahye

Belahi njagali mubel ye mandak ncakae recehan

Bebarot cepot, celane lambeng, dai belumew daki

Idang ahi bukannye bekurang malah betambah

Bile malam emperan toko badah jeme cine lah katah ye tidok begelimpangan

Seragi ngak jeme mpai udem kene gempe tsunami,

Behumah ye atapye langit ngak bekasor sahong buhok.

gumbaknye kusot bunyae, harte ye ade gi barot cepot, katah ngahi lumpor ngak daki

Liou bangai maseh nites sampai ke keneng

Oi... sandi mane nian rabanan itu bedatangan

Ape tebatak angin gunong, ye semang ngelahaiyi,

Ape nggelindeng sandi buket, ye dek tahan ngak mbauye,

Ape lahir suhang sandi rahim ye dibutiengi ngak penguase 

Dalam liang lahad bumi kite ye ujinye kaye

Ye bebarot seragam alap semang nulehye

Tuape penggawian ngelahaiyi ye mak itu

Tetawe ncangak gi lemak mbesakkah pehuot suhang

Tangan kulat gimbel ngugor awangan mubel,

Sambil bekate lapae,,,lapae,,,lapae

anye nyelingos daiye mpok ade duet

semang nuleh lok dide keruan, dek bepehasean ngak seragam alap tadi

Bukannye “jeme sare ngak anak anak ye telantar dikelahaiyi uleh negara”

Mbak ini,,, tinggal

Teks cerite ye dide laku, digek lenget di pajoh rayap

Ye tinggal kapagh, di geduong miwah,

Ye isinye jeme calak, ngan pacaknye mbudikah jeme sare,

Talang Jawa Selatan, 29 Juli 2013

Jimat Puyang

Karne jauh ngak agame jimat puyang njadi jawabannye

Nempatkah dihi ke badah ye neman ngak balak

Tuape kina penggawian haram dilanjakkah

Puyang kite dek kelah ngajak anak cucungye rusak

Jimat punyang bukannye kandek cicak gerot

Dang alap saje amen jimat ngak pusake puyang

Dijadikah barang kelamean budaye daerah kite

Mangke pacak jeme ye tandang badah kite ndapat cerite

Kalu tegheban kabah dek nurut kate

Tekurung suhang di ume ye dikelilingi ngak himbe

Di dalam rimbe gi katah binatang buasnye

Ye dek kene disebut namenye

Pagar Sari, Agustus 2013

Bekela ke Tanjung Sirih

hehaduh senampur sandi penggawian sahi sahi

bekela kudai ke tanjung sirih nginak cuhop

ribang nian kundang kance nak ngikot gale

lenget peneng palak leh penggawean kemahi

mpok udem kemarahan leh bos dek kehasean amen lah disini

pariwisata daerah kite mustie kite jage

kandek dinikmati sesame

oi ringkeh nian pemandangannye

ciptaan ye maha kuase dek bie bandingannye

lah sampai pule petang
ase semang balek kehumah
mpok batang batang bedihi kaku
anye aku musti balek, penggawean laen lah nunggu pule

mpok kebile kina aku masehkah ngulang
melembutkah tulang, mbersihkah mate

nyenaikah rupoan sandi pingae tengah pasar

badah pelaluanku cakae majoh

Tanjung Sirih, 25 Agustus 2013

Puisi Bahasa Lematang Chairul Sujan

Palak Bapang Dek Tau Digadaikah

Dunie lah behubah mbak ini

Budak kecik lah pacak marahi bapang

Nginak ye alap diket nak endak’e

barang di pasar alap gale

nak idak mintak belikah

Kate bapang digek duet nak

Kinak pengabaran dunie mak ini

Minyak lah naek, anye balam dek berege

Behas saje dek bedie agi

Palak bapang dek laku amen nak dijual

Ndung lah tekuhus ngambini puntong

Mak mane kinah tekeheng ayek mate dek tehase

Gi katah kulaghan laen.

Pengidupan di dusun akap tulah

Kebile ade duet dikit, ngarak sanak yie betandang

Beutang ngak jeme ase diterajang

Pagar Sari, 06 Juli 2013

Tengah Ahi Kuneng

Angat mak ini ahi, laen ngak kemahi

Nyelekit mintak ampon

Tuape ye nak di gahi laju semang

Awak badan gi gagah, awak umur gi mude

Tuape nian mak ini tengah ahi kuneng kah betandang

Balek sandi ume dek bedie penggawian

Setak ume lah dimabek ngak jeme gerot

Pengidupan makse kite dek tau bekate

Anak lanang abes pengaharapan

Tengah ahi kuneng tidok siang

Nunggukah datange malam

Ngahap ade badah betandang

Tiap ahi mak itu tulah

kulaghan mintak duet bapang

Pagar Sari, 06 Juli 2013

Dek Bie Penggawian

Kebile ade jeme ngagok di dusun

Beribang bujang begadesan

Ade gades kule, ade bujang tanggong

Saling agok’i ndek pusean malam

Lemak nian ngabeskah malam

Awak buntu ngakok beduet

Awak buntu nak begaya care jeme kaye

Mbau minuman ujinye kandek hiburan

Dimane ade biduan kah dijadikah kance betembang

Suahe ngajong jeme balek, ase dek bie ye laen

Telinge kance tetuli nganeng mbak itu

Maseh saje mbak itu jadi kicean gadisan

Bepenganingan di dusun saje.

Awak sare dek ngakap,

PagarSari, 06 Juli 2013